Форуми во заедницата

Жителите на Гостивар гласаа за проектот “Кеј Вардар“

1.04.2010.

“Кеј Вардар“ е проектот што го избраа граѓаните во општина Гостивар, на седмата форумска сесија што се одржа на 25 март, во ресторанот “Дедебег“.       Присутните, со 34 гласа “за“, го избраа овој проект од четирите изработени во текот на изминатите Форуми, и го утврдија како приоритетен за подобрување на нивното секојдневие.     “Форумот изработи одлични проекти и препораки, и се надевам дека ќе продолжите да го имплементирате овој модел на демократија“, изјави Светлана Миленкова, раководител на Програмата од ЦИРа-организација што ја спроведува програмата во Гостивар.     Избраниот проект предвидува хортикултурно уредување и модернизирање на десната страна од течението на реката Вардар во општината, и модернизирање и реконструкција на левата страна од Вардар.    Носител на овој проект е општината, а партнер Јавното комунално претпријатие.     Временскиот период за изработка е шест месеци, со вкупен буџет од околу шест милиони и 600 илјади денари. Буџетот на Програмата за општина Гостивар изнесува шест милиони денари, од кои четири милиони се донација на Швајцарската агенција за развој и соработка (SDC), а два милиони денари учество на општината.     Остатокот од средствата за проектот треба да го обезбедат носителот и партнерот.     Програмата “Форуми во заедницата“ во Гостивар се одржува од октомври, минатата година. Освен Гостивар, во оваа фаза се вклучени и општините Берово, Дебар, Струмица, Могила, Новаци, Радовиш, Конче, Боговиње, Крушево, Гостивар, Аеродром и Македонски Брод.

 

< Претходно		Следно >